मुक्तिप्रसाद न्यौपाने,पाल्पा,वैशाष २९ - चिर्तुङधारा गाविस वडा नम्वर ८ निवासि ७० वर्षिय भुनिकला गाहा र ६५ वर्षिय कुमारी गाहाको हत्या गर्ने दुईजना हत्यारालाई शुक्रबार पत्रकार सम्मेलनबाट सार्वजनिक गरिएको छ ।

घर नजिकैको जंगलमा दिउसो गाइ बाख्रा चराउन निस्किएका दुई वृद्धालाई हत्या गर्ने तानसेन नगरपालीका भगवतिटोल बस्ने १७ वर्षिय रोहित शाही र अर्धाखाँची घर भई तानसेनमा डेरा गरी बस्ने तुलसी विक सार्वजनिक भएकाहुन् । दुवैजनाले मिलेर हत्या गरेको स्वीकार गरेको प्रहरी नायव उपरिक्षक मीरा चौधरीले बताईन् । उनीहरुको साथबाट लुटेका गहना बरामद गरिएको छ । 

सदरमुकाम तानसेनबाट पाँच किलोमिटर टाढा बाटोमा हत्या गरिएका अवस्थामा दुवै वृद्धाको लाश वैशाष २२ गते भेटिएको थियो। दुवै हत्यारालाई प्रहरी शुक्रबार विहान ४ बजे पक्राउ गरेको हो । पक्राउ परेका दुवैलाई हिरासतमै राखेर थप अनुसन्धान शुरु गरिएको प्रहरीले जनाएको छ ।

राजविराज, वैशाख २५- बलात्कारको अभियोगमा प्रहरीले सप्तरीबाट तीन जनालाई पक्राउ गरेको छ। पीडित महिलाको उजुरीपछि जिल्ला प्रहरी कार्यालय सप्तरीबाट प्रहरी निरीक्षक कुशबहादुर थापाको नेतृत्वमा खटिएको प्रहरीको गस्ती टोलीले तीन युवकलाई पक्राउ गरेको हो।पक्राउ पर्नेहरुमा रम्पुरा मल्हनिया–९ का २३ वर्षीय कपिल यादव, राजविराज–४ का २० वर्षीय विजय भन्ने दिवाकर दास र राजविराज–७ बस्ने २० वर्षीय मो. अनबारुल छन्। पीडित महिलाको सगरमाथा अञ्चल अस्पताल राजविराजमा स्वास्थ्य परीक्षण गराइएको प्रहरीले जनाएको छ।

पक्राउ परेका तीन जनासहित पाँच जनाले राजविराज–९ स्थित भलुवाही डिलमा गत वैशाख २२ गते ती महिलालाई सामूहिक बलात्कार गरेको भन्दै पीडितले गत शुक्रबार जाहेरी दर्ता गराएकी थिइन्। घटनाबारे आवश्यक अनुसन्धान भइरहेको र पक्राउ परेका तीन जनामाथि कानुनी कारबाहीको प्रक्रिया अघि बढाइएको प्रहरी निरीक्षक थापाले जानकारी दिए। 

पक्राउ परेका तीनैलाई अनुसन्धानका लागि आज सप्तरी जिल्ला अदालतबाट सात दिनको म्याद थप गरी नियन्त्रणमा राखिएको र अन्य फरार दुईको खोजी भइरहेको सप्तरी प्रहरीले जनाएको छ। 
- रासस

काठमाडौं, वैशाख १५ - एक महिनाअघि काठमाडौंबाट अपहरणमा परेका गोरखाका व्यवसायी प्रकाश पन्तको हत्या भएको छ। अपहरणकारीले बेहोस हुने ट्याबलेट खुवाएर हत्या गरेको प्रहरी निष्कर्ष छ। पक्राउ अभियुक्तको बयानका आधारमा प्रहरीले पन्तको शव बिहीबार ककनीमा गाडिएको अवस्थामा फेला पार्‍यो।प्रहरीले अपहरण र हत्यामा संलग्न अभियोगमा भिम तामाङ, सोम श्रेष्ठ, कामानन्द खड्का र रत्न लामालाई पक्राउ गरेको छ। भिम काठमाडौंमा पक्राउ परेका हुन्। अन्य तीन अभियुक्तलाई महानगरीय प्रहरी अपराध महाशाखाको टोलीले भारतमा समातेको थियो।

अनुसन्धान स्रोतका अनुसार दाङको सिमेन्ट कारखानालाई चुनढुंगा बेच्दै आएका ५० वर्षीय पन्त चैत १२ गते अपहरणमा परेका थिए। उनी पूर्वसैनिक हुन्। उनलाई अपहरणकारीले युवती प्रयोग गरेर चाबहिलको ग्रिनल्यान्ड क्याबिन पुर्‍याएका थिए। अपहरण सजिलो पार्न पेय पदार्थमा बेहोस हुने औषधि मिसाएर खुवाए। डोज बढी भएकाले उनको मृत्यु भएको अनुसन्धानमा संलग्न प्रहरी अधिकारीले बताए। त्यसै रात १० बजे उनीहरूले पन्तको शव ककनी पुर्‍याएर गाडेको खुलेको छ।
सेनाबाट अवकाश पाएका पन्त हराएको जानकारी महानगरीय प्रहरी अपराध महाशाखामा आएपछि विशेष टोली परिचालित भएको थियो। उक्त टोलीले केही दिनअघि काठमाडौंमा भिमलाई पक्राउ गरेपछि अपहरणकै दिन हत्या भएको खुलेको हो।


अनुसन्धान क्रममा अपहरणमा संलग्न केही व्यक्ति नेपाल-भारत सीमाबाट करिब ४० किलोमिटरभित्र मध्यपुरामा रहेको सूचनाका आधारमा काठमाडौंबाट टोली गयो। टोलीले बुधबार सोम, कामानन्द र रत्नलाई त्यहीँ पक्राउ गरी काठमाडौं ल्याएको थियो। 

प्रहरी अधिकारीका अनुसार भिम पटकेचोर हुन्। उनी यसअघि चोरी अभियोगमा पक्राउ परी तीन वर्ष कारागार बसेका थिए। सोम पूर्वसैनिक रहेको विश्वस्त स्रोतले बतायो। पक्राउ अभियुक्तहरूले सुरुमा पन्तको पैसा लुट्ने र बेहोस बनाएर गेस्ट हाउसमा बन्धक राखेपछि परिवारका सदस्यसँग फिरौती असुल्ने योजना बनाएको बयान दिएका छन्।पन्तसँग प्रशस्त पैसा भएको र धादिङमा होटल चलाएर बसेकी उनकी श्रीमतीबाट पनि राम्रो फिरौती असुल्न सक्ने ठानेको अभियुक्तहरूले बताएका छन्। 'औषधि खुवाएर बेहोस बनाउने मात्र योजना थियो,' कामानन्दको बयान उद्धृत गर्दै स्रोतले भन्यो, 'औषधिको डोज धेरै भएछ, बेहोस भएपछि उठ्दै उठेन।'अपहरणमा संलग्न अन्य अभियुक्त खोजीकै क्रममा रहेको भन्दै महाशाखाका अधिकारीले घटनाबारे केही बताउन चाहेनन्। 
समाचार नागरिक न्युज बाट 

रौतहट, वैशाख १४-रौतहटको औरैया ९ पिपराटोलबाट गएराति  अपहरणमा परेकी एक महिलालाई २४ घण्टापछि प्रहरीले सकुशल उद्धार गरेको छ । औरैया ९ की ५५ वर्षीया उषा झालाई विहीबार गौर नगरपालिका ७ बाट प्रहरीले उद्धार गरेको हो । बुधवार राति घरमा एक्लै रहेको मौका छोपेर १० जनाको समूहले घरबाटै अपहरण गरेको थियो । अपहरणकारीले शुरुमा घरबाट नगद तथा गहना लुटे पछि आफूलाई पनि घरबाट अपहरण गरेको महिलाले बताएकी छिन् ।  अपहरणकारीले उषा कै मोबाइलबाट परिवारसँग ५० लाख रुपैया समेत मागेका परिवारले बताएका छन् ।उषालाई  परिवारको जिम्मा लगाइएको तथा अपहरणकारीहरुको खोजी भइरहेको जिल्ला प्रहरी कार्यालय रौतहटका  प्रहरी नायब उपरीक्षक चक्र बहादुर सिंहले जानकारी दिए ।
समाचार कारोबार दैनिक 

 काठमाडौँ, वैशाख १३-  अपहरण गरी भारत पुर्‍याइएका काठमाडौँ सतुङ्गलका युवक सुरेश महर्जनलाई प्रहरीले सकुशल मुक्त गरी तीन जना अपहरणकारीलाई पक्राउ गरेको छ। घुम्न जाने बहानामा भारत, रुपइडिहा पुर्‍याएर बन्धक बनाइएको थियो। चैत १९ गते अपहरणमा परेका महर्जनको रिहाइका लागि अपहरणकारीले तीन करोड फिरौती रकम माग गरेका थिए। महानगरीय प्रहरी अपराध महाशाखाबाट खटिएको विशेष टोलीले भारतीय प्रहरीसँग समन्वय गरी बुधबार उनलाई भारतीय भूभागबाट अपहरण मुक्त गरेको हो। 

महाशाखाका प्रमुख देवेन्द्र सुवेदीका अनुसार अपहरणमा संलग्न तीन जना नेपाली पक्राउ परेका छन्। अपहरणमा अन्य व्यक्ति पनि संलग्न रहेको देखिएको उनले बताए। पक्राउ परेका अपहरणका अभियुक्त र पीडितलाई प्रहरीले काठमाडौँ ल्याउँदैछ।
समाचार नागरिक न्यूज बाट 

धनगढी, चैत २७ - कैलालीको खैरला गाविस १ की८ वर्षीय  बालिकाको बलात्कारपछि हत्या गरिएको छ। बालिका कृष्ण नेपालीलाई १३ वर्षीय नरबहादुर सावदले वलात्कार गरी हत्या गरेको प्रहरीले जनाएको छ।कैलाली प्रहरी उपरीक्षक वसन्त पन्तका अनुसार घर नजिकैको खोलामा नुहाउन गएको समयमा बालिकाको वलात्कार भएको थियो। बालिकाले घरमा भनिदिने बताएपछि घाटी थिचेर मारेको अभियुक्त सावदले स्वीकार गरेको पन्तले जानकारी दिए। बालिकाको शब आज बिहान ४ बजे भेटिएको हो।
स्रोत :नागरिक न्यूज 

काठमाडौं, चैत २२ - अमेरिकाको क्यालिफोर्नियास्थित एउटा विश्वविद्यालयमा पूर्वविद्यार्थीले जथाभावी गोली चलाउँदा नेपालीसहित सात विद्यार्थी मारिएका छन्।ओकल्यान्डको ओइकोस विश्वविद्यालयमा भएको उक्त गोलीकान्डमा नेपाल, कोरिया, फिलिपिन्स, नाइजेरियाका विद्यार्थी मारिएको त्यहाँका प्रहरी प्रमुख जोन हवार्डलाई उद्धृत गर्दै बिबिसीले जनाएको छ।  प्रहरीका अनुसार कोरियाली मूलका अमेरिकी नागरिक वान गो ले सोमबार बिहान कक्षा कोठामा छिरेर जथाभावी गोली चलाउँदा पाँचजनाको घटनास्थल र दुईको अस्पतालमा मृत्यु भएको हो। प्रहरीका अनुसार तीन विद्यार्थी घाइते भएका छन्। गोली चलाएर भागेका आक्रमणकारीले पछि प्रहरीसमक्ष आत्मसमर्पण गरेका थिए। आक्रमणकारी विश्वविद्यालयको प्रशासकसँग असन्तुष्ट रहेको र बदला लिने मनसायले यस्तो गरेको प्रहरी प्रमुख जोर्डनले बताए। 

प्रत्यक्षदर्शीहरूका अनुसार उनले कक्षामा छिरेर सबैलाई भित्तामा घोप्टिन लगाएर एकएक गर्दै गोली हानेका थिए। 'उनले कक्षामा छिरेर म तिमीहरूलाई मार्न आएको हुँ, भित्तातिर फर्केर लाइन लाग भन्यो,' एक प्रत्यक्षदर्शी विद्यार्थीले स्थानीय सञ्चार माध्यमसँग भनेकी छन्, 'हामीले सुरुमा जिस्केको ठानेका थियौं।'
स्रोत :नागरिक न्यूज 

ताप्लेजुङ , चैत्र २१ - श्रीमानले गरेको भाला प्रहारबाट घाइते चाँगे गाविसकी एक महिलाको उपचार क्रममा मृत्यु भएको छ । चाँगे ८ की अमृता लिम्बुको विराटनगरबाट धरान लैजाने क्रममा आइतबार निधन भएको प्रहरीले जनाएको छ ।

प्रहरीका अनुसार जिल्लामा उपचार सम्भव नभएपछि विराटनगरस्थित न्युरो अस्पताल लगिएको थियो । त्यहाँ पनि उपचार नहुने भन्दै रेफर गरेपछि धरान लैजाने क्रममा बाटैमा मृत्यु भएको हो । शनिबार विवाद हुँदा नरबहादुर साँवाले सुँगुर मार्न प्रयोग गरिने फलामको भाला गुप्तांगमा प्रहार गरेका थिए ।

प्रहरी नियन्त्रणमा रहेका साँवाका अनुसार उनले प्रहार गरेको भाला अमृताको गुप्तांगभित्र पसेको थियो । छोराछोरीले झगडा भएको हल्ला गरेपछि उनलाई उपचारका लागि चाँगेको दोभान पुर्‍याइएको थियो ।

'मैले सिक्किम जानका लागि पैसा मागेँ, उसले गुन्यू उचालेर देखाई, रिस उठेर त्यहीबेला छेवैमा रहेको भाला उचालेर हान्दा भित्र पस्यो,' साँवाले भने । तुरुन्तै रगत नआएको र सामान्य अवस्थामा रहेकाले उनको मृत्यु भएको हुन नसक्ने दाबी साँवाले गरेका छन् । १ देखि २६ वर्षसम्मका ५ छोराछोरीका बाबु उनले दाजुकामा जान ३ हजार मागेको बताए ।
स्रोत :कांतिपुर दैनिक 

काठमाडौ, चैत्र १७ - परिचित कसैले सामान पठाउन विदेशस्थित आफन्तको ठेगाना मागे होस पुर्‍याउनुहोला । तपाईंले दिएको ठेगानामा लागूऔषध पुगेर विदेशमा रहेका आफन्त जेल पर्न पनि सक्छन् । लागूऔषध कारोबारीले चिनजानका व्यक्तिको विदेशमा रहेका आफन्तको ठेगानामा लागूऔषध पठाएर कारोबार गर्ने गरेको पाइएको छ ।

सामान पठाउने नाममा चरेस पठाइदिएका कारण गत फेब्रुअरीमा जापान र क्यानडामा दुई नेपालीले लागूऔषध कारोबारीको अभियोग खेप्नु पर्‍यो । नाता पर्ने राजकुमार चौहानको अनुरोधमा सामान बुझेकै कारण जापानको फुकुओकामा बस्ने राजीव छेत्री -नाम परिवर्तन) झन्डै २ महिना त्यहाँको प्रहरी हिरासतमा बस्नु पर्‍यो । लागूऔषधको कारोबारमा उनको कुनै संलग्नता नरहेको प्रमाण नेपाल प्रहरीले दिएपछि उनी आइतबार तारेखमा छुटेका छन् ।

क्यानडाको एउटा विश्वविद्यालयमा प्राध्यापन गर्ने एक नेपालीको घरमा कुरियरमार्फत २१ किलो चरेस पुगेपछि उनी अनुसन्धानको घेरामा छन् । त्यहाँको प्रहरीले उनको पासपोर्ट जफत गरेको छ । लागूऔषध कानुन कार्यान्वयन इकाईका अनुसार एउटा गिरोहले दिल्लीबाट कुरियर गरी चरेस ओसारपसार गर्ने गरेको खुलेको छ । उक्त गिरोहले नेपालबाट दिल्ली पुर्‍याइएको चरेस कुरियर गरी गन्तव्यमा पुर्‍याउने गरेको छ ।

गिरोहका सदस्यले चिनजानका व्यक्तिको विदेशमा रहेका आफन्तको खोजी गर्छन् । लागूऔषध पुर्‍याउनुपर्ने गन्तव्यमा चिनजानका व्यक्तिको कोही आफन्त रहेछ भने जरुरी सामान पठाउनु छ भनेर ठेगाना माग्छन् । 'कुरियरबाट आएको बुझेर सघाउन अनुरोध गरी तिनले चरेस पठाउने गरेको खुलासा भयो,' इकाईका डीआईजी यादव अधिकारीले भने, 'विदेशमा सामान पुगेपछि सुरक्षा निकायले थाहा नपाएको विश्वस्त भए मात्र तिनले सामान लिन आफ्ना मान्छे पठाउँछन् ।'

नाता पर्ने राजकुमारले साथीले कुरिअर गरी पठाएको सामान बुझिदिनु उसको मान्छेले सम्पर्क गरी लैजान्छ भनेपछि राजीवले हुन्छ भने । फेब्रुअरीको पहिलो दिन भारतको दिल्लीबाट कुरियर गरेको सामानको पोको उनको घरमा पुग्यो । तर पाँचौं दिन जापानी प्रहरीले खानतलासी गर्दा चार किलो चरेस फेला परेपछि उनी हिरासतमा पुगे ।

इकाईका एसएसपी नवराज सिलवालका अनुसार विकसित मुलुकका विमानस्थलमा कुरियरबाट प्रतिबन्धित वस्तु फेला परे पनि प्रहरीले गिरोहसम्म पुग्न ती वस्तुलाई गन्तव्यसम्म पुग्न दिन्छन् । फुकुओकामा राजीवको घरमा भित्रिएको चरेस लिन आउनेलाई समात्न प्रहरीले पाँच दिन निगरानी गरेको थियो । तर कोही नआएपछि पाँचांै दिन चरेस बरामद गर्‍यो । 'यसबीचमा उक्त चरेस बुझ्न आउनुपर्ने व्यक्तिले राजीवको घरमा टेलिफोन गरेका थिए,' सिलवालले भने, 'तर प्रहरी निगरानीको आशंकामा सामान लिन गएनन् ।'

त्यसपछि राजीवको यहाँस्थित परिवारले खबर गरेपछि इकाईले सुरुमा राजकुमारसँग सोधपुछ गर्‍यो । राजकुमारले दिल्लीमा बस्ने साथी सुवास अधिकारीको अनुरोधमा जापानमा कुरा गरी ठेगाना दिएका रहेछन् । भारतीय प्रहरीमार्फत अधिकारीसँग सोधपुछ गर्दा उनले आफ्नो जिल्ला नुवाकोटका दिल्ली बस्ने साथी रेमबहादुर तामाङले अनुरोध गरेकाले सामान पठाउन सघाए पनि चरेस पठाउन थालेको थाहा नभएको बताए । रेमलाई पनि उक्त सामान नुवाकोटका अनिल तामाङ र चाम्ले तामाङलाई दिएको खुल्यो । 'तर पोकोमा लागूऔषध छ भन्ने कुरा रेमलाई चाहिँ थाहा थियो,' डीआईजी अधिकारीले भने । तर सुवास पक्राउ परेको भोलिपल्टदेखि मोबाइल अफ गरेका अनिल र चाम्ले पक्राउ परेका छैनन् ।

यसबीचमा नेपालबाट एकजनाले राजीवको घरमा टेलिफोन गरी सामान पुगे नपुगेको सोधेपछि चरेस पठाउने सञ्जालको थप गहिराइमा प्रहरी पुगेको छ । उक्त टेलिफोन गर्ने नुवाकोटकै जोक्ते तामाङ थिए । जोक्तेलाई नियन्त्रणमा लिएपछि उक्त सामान सोमबहादुर तामाङले पठाएको पत्ता लाग्यो । सोमबहादुर लागूऔषध मुद्दामा २०५९ सालमा पक्राउ परी जेल सजाय काटेपछि दिल्लीबाट कारोबारमा सक्रिय भएको डीआईजी अधिकारीले बताए । गिरोहले जापानमा बस्ने रेशम तामाङले पाउने गरी उक्त चरेस पठाएको खुलेको छ ।

अनुसन्धान टुंगोमा पुगिनसकेका कारण क्यानडामा प्राध्यापन गर्ने नेपालीकहाँ कसरी चरेस पुग्यो भन्ने जानकारी प्रहरीले गराएको छैन । फेब्रुअरी ७ मा ती प्राध्यापक बस्ने विश्वविद्यालयको क्वार्टरमा २१ किलो चरेसको कार्टुन पुगेको थियो । प्रहरीले तत्काल छापा मारेर उक्त चरेस बरामद गरेपछि विश्वविद्यालयले उनलाई क्वार्टरबाट निकालेको छ । 'अब कसैले सामान पठाउन विदेशका आफन्तका ठेगाना मागे नदिनु वेश,' अधिकारीले भने, 'विदेश ओहोरदोहोर गर्दा कसैले सामान पुर्‍याइदिनु भने सामान हेरेपछि मात्र बोक्नुपर्ने भयो ।'
स्रोत :कांतिपुर दैनिक 

नुवाकोट (त्रिशूली), चैत १४- रक्सी सेवन गरी रसुवाका एक व्यक्तिले आफ्नै श्रीमतीलाई खुकुरी प्रहार गरी मरणासन्न अवस्थामा पुर्‍याएका छन्। 


रसुवाको धैबुङ-८ घर भई नुवाकोटको विदुर नगरपालिका-४ बट्टारमा डेरा गरी बस्दै आएका लयुल तामाङले आफ्नी श्रीमती ४० वर्षीया कान्छीलाई रक्सी सेवन गरी आज मध्याह्न खुकुरी प्रहार गरी गम्भीर घाइते बनाएको जिल्ला प्रहरी कार्यालयले जनाएको छ। 

घाइते कान्छीको त्रिशूली अस्पतालमा उपचार भइरहेको छ। उनको टाउकोमा गम्भीर चोट लागेकाले सात टाँका लगाइएको छ। 

उनलाई थप उपचारका लागि काठमाडौँ 'रिफर' गरे पनि कोही पनि आफन्त अस्पतालमा नआएको कारण उनलाई मङ्गलबार साँझसम्म पनि काठमाडौँ लगिएको छैन। 
रक्सी सेवन गरी आएका लयुलले श्रीमतीले भैंसीको स्याहार राम्रोसँग नगरेको विषयमा झगडा हुँदा खुकुरी प्रहार गरेको उनले प्रहरीसमक्ष वयान दिएका छन्। रासस