सशस्त्र महानिरीक्षकको म्याद नथपिने
काठमाडौं, असार २३ - तीसवर्षे सेवा हदले यही असार ३० गते अनिवार्य अवकाश पाउन लागेका सशस्त्र प्रहरी महानिरीक्षक (आइजिपी) सनतकुमार बस्नेतको म्याद नथपिने उपप्रधान तथा गृहमन्त्री कृष्णबहादुर महराले प्रष्ट गरेका छन्।
पोखरामा जारी पश्चिमाञ्चल सुरक्षा भेलाको दोस्रो दिन बन्दसत्रमा महराले 'सरकारले व्यक्तिका लागि कानुन संशोधन नगर्ने' उल्लेख गर्दै केही दिनमै नयाँ आइजिपी नियुक्त गरिने जानकारी दिए।
'म, गृहसचिव, जनपद आइजिपी सबै नयाँ छौ,' महराले भने, 'राष्ट्रिय अनुसन्धान र सशस्त्रमा पनि नयाँ नै नियुक्त गरेर हाम्रो स्पिरिट अझ बढाउँछौ।'
म्याद थप गर्ने पहलस्वरूप आइजिपी बस्नेत सेवाकालको आखिरी महिना पनि बिदा बसेका छैनन्। उनीसँगै अवकाश पाउने अनुसन्धान विभाग प्रमुख अशोक भट्ट तीन सातादेखि बिदामा छन्। अहिले मोती गुरुङले अनुसन्धान विभागको कायममुकायम प्रमुख चलाइरहेका छन्।
सुरक्षा निकाय प्रमुख र उच्च ओहोदाका अधिकारी अवकाशको एक महिना अघिदेखि विदा बस्ने प्रचलन छ। 'हाम्रो नयाँ टिमले लेनदेन, राजनीतिकरण र पैसा नउठाउने प्रण गरेको छ,' महराले भने, 'सशस्त्रमा पनि त्यस्तै वाचा गराएर नयाँ नेतृत्व ल्याउँछौ।'
सहभागीहरूका अनुसार कम बोल्ने स्वभावका मन्त्रीले 'नयाँ नियुक्ति गर्ने' बताएपछि बस्नेत खिन्न भएका थिए।
भेलाको समापनमा बस्नेतले पदावधि लम्ब्याउन नचाहेको सफाइ दिँदै भनेका थिए, 'अवधि हुन्जेल सेवा गरिरहुँ भनेको, अनेक शंका, उपशंका उब्जिएको रहेछ।'
सहभागीहरूका अनुसार तीन दशक लामो सेवाकालबाट 'बेदाग बाहिर निस्कन पाउनु सौभाग्यको कुरा हो' भन्दै बस्नेतले उल्लेख गरेका थिए, 'क्वार्टरबाट डेरा सर्ने पहिलो आइजिपी मै हुँदैछु।'
दुई वर्षअघि तीसवर्षे सेवावधि लागू भएपछि आइजिपी बनेका बस्नेत उक्त बन्देज हटाएर आफ्नो पदावधि दुई वर्ष थप्न चाहन्थे।
सेनाको डेढ वर्षे तालिम अवधिलाई जागिर मान्न नहुने भन्दै आफ्नो सेवा २०३९ साल मंसिरबाट गणना हुनुपर्ने बस्नेतको तर्क छ। बस्नेतकै निर्देशनमा सेनाबाट सशस्त्रमा प्रवेश गरेका १७ एआइजी, डिआइजी, एसएसपी, एसपीले गृह मन्त्रालयमा दिएको निवेदनमाथि निर्णय गरिदिन उनले बुधबार पनि ताकेता लगाए।
मन्त्रीका सुरक्षा सल्लाहकार गोपाल श्रेष्ठ र प्रहरी महाशाखामा टेलिफोन गरी उनले 'निवेदन टुंग्याइदिन' आग्रह गरेका छन्। 'हुने/नहुने टुंग्याइदिनुपर्यो,' बस्नेतलाई उद्धृत गर्दै गृहका एक सहसचिवले भने।
ती सत्र जनाले दुई साताअघि दिएको निवेदनमा सेनाबाट आएकाको तालिम अवधि नोकरीबाट कटाउन पाउनुपर्ने उल्लेख छ। 'सेनाको तालिममा पद हुँदैन, फुली लगाउन पनि पाइन्न, भत्तामात्र आउँछ, त्यसैले प्रहरीजस्तो सुरुदेखि नै सेवा अवधि गणना नहोस्,' निवेदनको विवरण उल्लेख गर्दै ती सहसचिवले भने।
Source:nagariknews
Posted by Butwalonline
on 8:03 AM. Filed under
