बुद्धसँग सम्बन्धित सङ्ग्रहालय ओझेलमा
तिलौराकोट क्षेत्रमा पर्ने कपिलवस्तु सङ्ग्रहालयको हाताभित्र रहेका बुद्धकालीन सम्पदाको उचित प्रचारप्रसार र संरक्षणको अभावमा सङ्ग्रहालय ओझेलमा पर्दै गएको हो । सङ्घीय मामिला, संविधानसभा, संसदीय व्यवस्था तथा संस्कृति मन्त्रालयको मातहतमा रहेको कपिलवस्तु सङ्ग्रहालयको रेखदेखमा कमी हुँदा यो स्थान संरक्षणबिहीन बन्दै गएको हो ।
चार बिगाहा क्षेत्रफलमा फैलिएको बुद्धसँग सम्बन्धित दुई हजार ७०० वर्ष पुराना सयौँ महत्वपूर्ण ऐतिहासिक वस्तु रहेको कपिलवस्तु सङ्ग्रहालय अहिले आएर सुनसान बनेको हो । राजा शुद्धोधनको राजदरबार भएर पनि यहाँ आउने पर्यटकले उचित सेवासुविधा नपाउँदा सङ्ग्रहालयको महत्वमा कमी आएको स्थानीय बासिन्दा घनश्याम घिमिरेको भनाइ छ ।
विसं २०४१ मा सङ्ग्रहालयको स्थापना गरी प्राचीन मूर्ति, धातु, शिलापत्रलगायतका महत्वपूर्ण वस्तु यहाँ राखिएका छन् । सङ्ग्रहालयभित्र रहेका दुईदर्जन बढी मूर्ति राखिएको घरसमेत प्रयोगबिहीन बन्दै गएको छ ।मन्त्रालयबाट सङ्ग्रहालयका लागि वाषिर्क रु २५ हजारमात्र बजेट आउने भएकाले समेत आर्थिक अभावमा यस ठाउँलाई व्यवस्थित गर्न समस्या परेको कार्यालयको दाबी छ । तर महत्वपूर्ण दस्तावेज रहेका सङ्ग्रहालयका सामग्रीसँगैको हाता सरसफाइ र रेखदेखको अभावमा दैनिकजसो घाँसे मैदानमा परिणत भएको छ ।
एघारजना कर्मचारीको दरबन्दी रहेको सङ्ग्रहालयमा अहिले आठजनामात्रै कार्यरत छन् । सरकारले सन् २०११ लाई पर्यटन वर्षका रूपमा मनाउने भने पनि पुरातत्व विभागबाट कुनै सहयोग नहुँदा समस्या भएको सङ्ग्रहालयका प्रमुख कृपाशङ्कर गुप्ता गुनासो गर्नुहुन्छ ।
सन् २०११ को जनवरी महिनादेखि मार्च २८ तारेखसम्म स्वदेशी एक हजार पर्यटकले यस ठाउँको अवलोकन गरेका छन् भने विदेशी पर्यटकमात्र १८६ आएको सङ्ग्रहालयको तथ्याङ्कमा उल्लेख छ ।
Source:Onlinekhabar
Posted by Butwalonline
on 10:33 AM. Filed under
Local News
.
You can follow any responses to this entry through the RSS 2.0.
Feel free to leave a response
