गण्डक बाँधको ठोकर नं. १२ भत्किए पछि बाँध फुट्ने खतरा
तत्काल ठोकर मर्मत नगरिए पानीको बहाव बढ्दा गण्डक बाँध नै फुट्ने खतरा देखिएको जलअभियानकर्मी कुलदीप आचार्यले बताए ।
कटान रोकथामका लागि जालीमा ढुङ्गा भर्ने काम भइरहेको भए पनि नदीमा पानीको बहाव धैरे भएकाले प्रभावकारी हुन सकेको छैन । गण्डक सम्झौताअनुसार गण्डक क्षेत्रमा निर्मित बाँधको रेखदेख र मर्मतको सम्पूर्ण जिम्मा भारतीय पक्षको हो ।
तर भारतीय पक्षले यस वर्ष बाँध र ठोकरमा मर्मतको कुनै काम नगर्दा ठोकर नं. १२ मा क्षति भएको गण्डक सङ्घर्ष समितिका सहसचिव शैलेन्द्र शर्माले बताए ।
नर्सही गाविसमा पर्ने विगैप १२ नं. ठोकरमा नारायणी नदीको मूलधार सिधै ठोकिने हुनाले यहाँ सबैभन्दा जोखिम हुने गर्दछ ।
नारायणी नदीमा पानीको सतह २ लाख ३० हजार क्युसेक नाघेको र अझै बढ्ने क्रममा छ । त्यसैले यसप्रति समयमा नै ध्यान नदिए नेपालका दर्जनौं गाउँ तथा भारतका सयौं गाउँ बाढीको चपेटामा पर्ने निश्चित छ ।
गण्डक सङ्घर्ष समिति र भारतीय प्राविधिकबीच २०६५ सालमा भएको सहमतिअनुसार भारतीय पक्षद्वारा प्रभावकारी रुपमा बाँधको मर्मत र संरक्षण गर्ने काम नहुँदा गण्डक बाँध फुट्ने खतरा देखिएको हो ।
समाचार कांतिपुर बाट
Posted by Butwalonline
on 3:10 PM. Filed under
