मदन भण्डारी गोल्डकप सुरु, गोर्खा ब्वाईजको विजयी सुरुवात
विनोद परियार,बुटवल कार्तिक १८-मदन भण्डारी स्पोर्टस एकेडेमी रुपन्देहीको आयोजनामा आजदेखि बुटवलमा मदन भण्डारी गोल्डकप नकआउट फूटबल प्रतियोगिता सुरु भएको छ । प्रतियोगिताको आज एक समारोहका बीच एमाले उपाध्यक्ष एवं मदन भण्डारी फाउण्डेसनकी केन्द्रीय अध्यक्ष विद्या भण्डारीले उदघाटन गर्नुभएको हो । प्रतियोगिताको उदघाटन खेलमा आयोजक निलोलाई गोर्खा ब्वाइज स्पोर्टस क्लव बुटवलले २–शुन्यले पछाडि पार्दै विजयी सुरुवात गरेको छ । प्रतियोगितामा दर्शकहरुको उल्लेख्य सहभागिता भएपनि आयोजक संस्थाको तर्फबाट खेलेको टिमले प्रतियोगिताभरी कुनै पनि गोल गर्न नसकेपछि दर्शकहरु निराश भएका थिए । खेल सुरु भएको १७ औं मिनेटमा गोर्खा ब्वाईजका अशोक गुरुङले कर्नर प्रहारलाई सदुपयोग गर्दै आफ्नो टिमको लागि खाता खोलेका थिए । पहिलो हाफमा १–शुन्यले अग्रता लिएको गोर्खा ब्वाईजका लागि दोस्रो हाफको पहिलो मिनेटमै गणेश खड्काले गोल गरेपछि विजय निश्चित भएको थियो । खेल अवधिभरी गोर्खा ब्वाईजले थप दुईवटा अवसर गुमाएको थियो भने आयोजक निलोका तर्फबाट पाएका तीनवटा सुवर्ण मौकालाई सदुपयोग गर्न नसक्दा खेलबाट बाहिरिनु परेको छ ।
आयोजक निलोले १७ औं मिनेट र दोस्रो हाफको १६ औं मिनेटमा पाएको फ्रि किक तथा ३८ औं मिनेटमा डी बक्सभित्र पाएको अवसरलाई कृष्ण गुरुङले सदुपयोग गर्न नसक्दा शुन्यमै चित्त बुझाउनु परेको हो । गोर्खा ब्वाईज स्पोर्टस क्लवले ए डिभिजनमा आवद्ध खेलाडी किपर विशाल श्रेष्ठ, एलिश मगर, सफल सापकोटा, गणेश खडका, नुरराज काफ्ले, कोभित कार्की र युगलकिशोर राईलाई मैदानमा उतारेको थियो ।
ए डिभिजनमा आवद्ध ७ खेलाडीलाई मैदानमा उतारेको गोर्खा ब्वाईज स्पोर्टस क्लवले आयोजक निलोका विरुद्ध गोलको वर्षा हुने संभावनालाई आयोजक निलोका सिद्धान्त अधिकारीले असफल तुल्याएका थिए । जितपछि गोर्खा ब्वाईजका प्रशिक्षक दयाराम सापकोटाले पहिलो खेल भएकाले खेलाडीहरुले सोंचे अनुरुप खेल प्रदर्शन गर्न नसकेपनि विजयी भएकाले आगामी खेलमा सशक्त प्रदर्शन गर्ने बताउनुभयो । उदघाटन खेलमा गोर्खा ब्वाईजका कोभित कार्की र आयोजक निलोका मनिश गुरुङ र कृष्ण गुरुङलाई प्रमुख रेफ्री बमबहादुर सारुले पहेंलो कार्ड देखाएका थिए ।
भोलिको खेल लिग विजेता सौभाग्य युवा क्लव बुटवल र डीएमसी तुल्सीपुरका बीच हुने आयोजकले बताएका छन् ।
Posted by Butwalonline
on 12:10 AM. Filed under
