प्रवासी नेपाली युवा संघ यूएइको अधिबेसन अप्रिल १२ मा हुने

उत्तम अधिकारी - अबुधाबी १७ मार्च २०१३ -रोजगारिका शिलसिलामा बिदेसिएका नेपाली युवाहरूलाई सँगठित गर्दै युवाहरूको हितका लागि प्राप्त  अबसरहरूको सामुहिक उपयोग गर्दै युवा जोश , जाँगर र उत्साहलाई साँगठनिक कार्यमा सदुपयोग गर्ने उद्देस्यका साथ २ बर्ष अघि यूएइमा स्थापित प्रवासी नेपाली युवा संघ यूएइले आफ्नो पहिलो कार्यकाल सम्पन्न गरि आगामी १२ अप्रिल २०१३ शुक्रबारका दिन दोस्रो केन्द्रिय अधिबेसन गर्ने भएको छ । २०१० को डिसेम्बर १० का दिन स्थापित संघले २२ डिसेम्बर २०१० मा युवा संघ नेपालका  अध्यक्ष महेश बस्नेतको बिशेष उपस्थितिमा आफ्नो पहिलो अधिबेसन सम्पन्न गरेको थियो ।

   
युवाहरुलाई लक्षित गर्दै  कार्यक्रमहरू  गरिरहेको संघले आफ्ना संगठन बिस्तारका क्रममा  क्षेत्रिय कमिटीहरूको निर्माण गरि प्रशस्त मात्रामा युवाहरूलाई संगठनमा आबद्ध गरेको छ । संघका केन्द्रिय अध्यक्ष महेश गिरीका अनुसार हालसम्म संघको मातहतमा अबुधाबी , दुबइ , अलऐन , बिदा जायेद र आसाब क्षेत्रमा क्षेत्रिय कमिटीहरू सक्रिय रहेका छन् ।

    
नेपाली नयाँ बर्षको अबसर पारी अप्रिल १२ मा आयोजना गर्न लागिएको उक्त अधिबेसनको पहिलो भागमा संगठन सम्बन्धी आन्तरिक क्रियाकलापहरू हुने र दोस्रो भागमा नयाँ बर्षको शुभकामना आदान प्रदान सहितको साँस्कृतिक कार्यक्रम समेत समाबेश हुने जानकारी संघका महासचिब बुद्धी प्रसाद सुबेदीले गराए । संघले जनाए अनुसार उक्त कार्यक्रममा युवा संघ नेपालका अध्यक्ष महेश बस्नेतको बिशेष उपस्थिती रहनेछ ।

     
अबुधाबीको केरला सोसियल सेन्टरमा ३० चैत्र २०६९ ( १२ अप्रिल २०१३ ) का दिन साँझ ४:३० बाट शुरु हुने उक्त शुभकामना आदान प्रदान सहितको साँस्कृतिक कार्यक्रममा सहभागी हुनका लागि यूएइ प्रवासमा कार्यरत सम्पुर्ण नेपाली दाजु भाई दिदि बहिनिहरुलाई संघका सचिव राजु भुजेलले अनुरोध गरेका छन् ।