ट्वीटरमा लेखेको कमेन्टले प्रहरी अधिकृत निलम्बनमा
रियो दि जेनेरियो प्रहरी चौकीका निरीक्षक पेड्रो पाउलो पिन्होले ट्वीटरमा आफ्नो चौकीमा कार्यरत १४ जना महिला प्रहरीमध्ये एक जनामा मात्रै प्रहरीका लागि आवश्यक पर्ने प्रतिभा, साहस र दृढता रहेको उल्लेख गरेका थिए ।
त्यसलगत्तै सामाजिक सञ्जाल मार्फत महिला सहकर्मीको अपमान गरेको आरोपमा उनलाई बर्खास्त गरी उनको ठाउँमा महिला अधिकारीलाई नियुक्त गरिएको छ । प्रहरी निरीक्षक पिन्होले आफ्नो आशय महिलाको अपमान गर्नु नभएको भन्दै आफ्नो ट्वीटलाई गलत व्याख्या गरिएको दावी गरेका छन् ।
प्रहरी चौकीमा कार्यरत एक जना महिला प्रहरीको लामो समय देखिको गलत व्यवहारका कारण दिक्क भएपछि त्यस्तो ट्वीट गरेको उनको भनाई छ । ती महिला प्रहरीले काम नगरी ट्वीट गरेर बसेकाले आफुले पनि ट्वीटरमार्फत प्रहरीको कामका लागि प्रतिभा र दृढता आवश्यक पर्ने भन्दै व्यंग्य गरेको स्वीकारेका छन् ।
रियो द जेनेरियो प्रहरी प्रमुख मार्था रोचाले ती प्रहरी निरीक्षकको व्यवहार प्रहरी चौकीका प्रमुखका लागि अशोभनीय भएको र मातहतको जनशक्ति व्यवस्थापनमा कमजोर देखिएकाले उनलाई बर्खास्त गरिएको बताउनुभएको छ ।स्रोत उज्यालो नेटवर्क
Posted by Butwalonline
on 7:41 AM. Filed under
