सुपरमार्केटमा भएको आगलागीमा परी एक महिलाको मृत्यु
काठमाडौं, मंसिर २४ - डल्लु आवासमा रहेको रेनमार्क सुपरमार्केटमा गएराति भएको आगलागीमा परी एक महिलाको मृत्यु भएको छ। आगलागीमा परी विमला शाहीको निधन भएको महानगरीय प्रहरी परिसर काठमाडौका प्रवक्ता डिएसपी धिरजप्रताप सिंह जानकारी दिए।
भाडामा बस्दै आएकी ५० वर्षीया विमलाको उपचारको क्रममा नर्भिक अस्पतालमा निधन भएको हो। विमला मदन शाहीको घरमा भाडामा बस्दै आएकी थिइन्।
शाहीको ५ तल्ले शनिबार साँझ भएको आगलागीमा परी अन्य चार जना घाइते भएका छन्। घाइते हुनेमा ३५ वर्षीय मर्ध शाही, २७ वर्षीय अम्बिका खड्की, १७ वर्षीय रितेश श्रेष्ठ र शीरीष शाही छन्। आगलागीमा परी घाइते शीरीषको अवस्था गम्भीर रहेको अस्पताल स्रोतले जनाएको छ। उनको आइसियूमा राखी उपचार भइरहेको छ।
त्यस्तै, धर्मको भागदौडमा परी खुट्टा भाँचिएको छ भने, शरीरका विभिन्न भाग जलेको छ। रितेश र अम्बिकाको शरीरको धेरै भाग जल्नुको साथै शरीरमा अक्सिजनको मात्रा कम रहेको अस्पतालले जनाएको छ। उनीहरुको वीर अस्पतालमा उपचार भइरहेको छ।
ईश्वर महर्जनले घरको पहिलो तल्लामा राखेको खाद्य गोदाममा आगलागी भएको प्रहरीले जनाएको छ।
'आगलागीमा परि एक महिलाको मृत्यु भएको छ, अन्य चार घाइते छन्,' प्रवक्ता सिंहले भने, 'बिस्कुट, चाउचाउसहितको गोदामा आगलागी भएको छ।'
साँझ ६ बजे सल्किएको आगो स्थानीयबासी, प्रहरी र दमकलको सहयोगमा पौने ८ बजे नियन्त्रणमा आएको थियो।
समाचार :नागरिक न्यूजबाट
Posted by Butwalonline
on 7:03 AM. Filed under
