ट्राफिक प्रहरीद्धारा गति नाप्ने राडार गन संचालन आज पहिलो दिन १६० वटा सवारी साधन कारवाहीमा

सम्बाददाता भक्तपुर, मंसिर ०८ । महानगरीय ट्राफिक प्रहरी परिषर् भक्तपुरले उपत्यका मै पहिलो पटक भक्तपुरमा आजदेखि सवारी साधनको गति नाप्ने यन्त्र अर्थात राडार गन संचालनमा ल्याएको छ । सडकमा तिब्र गतिमा सवारी चलाउनाले दुर्घटनामा बृद्धि भएपनि सवारी साधनको तिब्रगति नियन्त्रण गर्न ट्राफिक प्रहरीले उपत्यका मै पहिलो पटक आज देखि भक्तपुरमा राडार गन संचालनमा ल्याएको महानगरीय ट्राफिक प्रहरी परिषर भक्तपुरका प्रमुख एवं ट्राफिक प्रहरी निरिक्षक मुरारी मिश्रले बताउनुभयो ।
                                                                                                                                                                                                                                                               गन संचालनमा ल्याएको पहिलो दिन नै आज तिब्र गतिमा सवारी चलाउने १६० वटा सवारी साधनलाई कारबाही गरि एकसय रुपैयाका दरले जरिवाना गरेको उहाँले बताउनुभयो । सबभन्दा बढी तिब्र गतिमा सवारी साधन चलाएर कारबाहीमा पर्नेमा मोटरसाईकल र मिनिट्रक रहेको र त्यसपछि स्कूल बसदेखि सरकारी गाडी समेत कारबाहीमा परेको छ । राडार गनले दुईसय मिटर परबाट आएको सवारी साधन तर्फ राडार गन देखाउने बित्तिकै सवारी साधनको गति देखाउने गर्दछ । डिजिटल प्रबिधिको सो गनले तिब्रगतिमा आएको सवारी साधनको गति अंकमा देखाउँने गर्दछ । तिब्र गतिमा आएको सवारी साधनको गति देखाउने बित्तिकै त्यस्ता सवारी साधनलाई नियन्त्रणमा लिएर कारबाही गरिने उहाँले बताउनुभयो ।
                                                                                                                                                                                                                                                               अरनिको राजमार्गखण्ड अन्तर्गत ६ लेन सडकमा तिब्र गतिमा सवारी चलाएर दुर्घटनामा बृद्धि भएपछि यसलाई न्यूनिकरण गर्न ट्राफिक प्रहरीले राडार गन संचालनमा ल्याएको हो । सडकमा प्रतिघण्टा ६० किलोमिटर भन्दा बढीको गतिमा गुडेका सवारीलाई तत्काल नियन्त्रणमा लिएर कारबाही स्वरुप एकसय रुपैया जरिवाना गरिने मिश्रले बताउनुभयो । ट्राफिक प्रहरीले भक्तपुरमा चारवटा राडार गन ल्याएको छ । यसले जडिबुटी देखि सुर्यविनायकसम्म गुड्ने सवारी साधनको गति नाप्न प्रयोग गरिने छ । ब्याट्रिबाट संचालन गरिने राडार गन तत्कालका लागि प्रहरीको चारवटा सिभिआर भ्यानको व्याट्रिबाट संचालन गरिने छ । केही समय पछि यसका लागि छुट्टै व्याट्रि ल्याएर संचालन गरिने भएको छ ।
                                                                                                                                                                                                                                                        सडकमा एकैपटक धेरै सवारी साधन आएको छ भने पनि राडार गन सवारी आएतिर देखाउने बित्तकै तिब्र गतिमा आएको सवारी साधन कति गतिमा आएको छ भन्ने देखाउने गर्दछ । ट्राफिक प्रहरीले आवश्यकता अनुसार सो सडकको दैनिक फरक फरक स्थानमा राखेर गति नाप्न राडार गनको प्रयोग गर्ने भएको छ ।
राडार गनको आज महानगरीय प्रहरी परिषर भक्तपुरका प्रमुख एवं प्रहरी उपरीक्षक दिलिपकुमार चौधरीले उद्घाटन गर्नुभएको थियो । यसअघि राडार गन पोखरामा संचालन गरिएको थियो ।