कारले दुईवटा मोटरसाइकललाई ठक्कर दिँदा दुई जनाको मृत्यु
भक्तपुर, असोज २७ - काठमाडौँबाट तीव्र गतिमा भक्तपुरतर्फ जाँदै गरेको एक कारले भक्तपुरतर्फ जाँदै गरेका दुईवटा मोटरसाइकललाई मध्यपुरथिमिको राधेराधे अगाडि एकैसाथ ठक्कर दिँदा दुई जनाको मृत्यु भएको छ भने दुईजना घाइते भएका छन्।
बा ८ च ७८३२ नम्बरको कारले भक्तपुरतर्फ जाँदै गरेको बा ३५ प ५२३८ नम्बरको मोटरसाइकललाई ठक्कर दिँदा सो मोटरसाइकलमा सवार दुवैको घटनास्थलमै ज्यान गएको छ।
दुर्घटनामा परी मृत्यु हुनेमा काठमाडौं लाजिम्पाट बस्ने वाङ्देल लामा र सोही ठाउँका फूर्वा टेन्डी शेर्पा रहेका छन्।कारले बा १९ प ८१३२ नम्बरको अर्को मोटरसाइकललाई पनि ठक्कर दिँदा सो मोटरसाइकलमा सवार काठमाडौं साङ्ले गाविस-१ झोरका सुदर्शन सापकोटा र लाजिम्पाटका उसान लामा घाइते भएका छन्।
घाइते दुवैको भक्तपुर अस्पतालमा उपचार भइरहेको छ। घाइते सापकोटाले भक्तपुरको सङ्ग्रहालय हेर्न दुईवटा मोटरसाइकलमा आएको तर राधेराधे पुगेपछि पछाडिबाट हर्नसमेत नबजाई तीव्र गतिमा आएको कारले साथीको मोटरसाइकललाई ठक्कर दिएको बताए।
मृतकहरूको शरीर क्षतविक्षत भएको छ भने ठक्कर दिने कार सडकमै दुई फन्का घुमेर अगाडिको भाग पूरै क्षतिग्रस्त भएको छ।
ठक्कर दिएलगत्तै फरार रहेका कारका चालकको खोजी भइरहेको महानगरीय प्रहरी वृत्त थिमिका प्रहरी नायब उपरीक्षक राजन अधिकारीले बताए। रासस
स्रोत :नागरिक न्यूज
Posted by Butwalonline
on 8:14 PM. Filed under
National News,
News
.
You can follow any responses to this entry through the RSS 2.0.
Feel free to leave a response
