घूस प्रकरणमा मुछिएका मन्त्री बेलवासेले राजीनामा दिए

काठमाडौं, कार्तिक ५ - घूस प्रकरणमा मुछिएका श्रम तथा रोजगारमन्त्री कुमार बेलवासेले राजीनामा दिएका छन् । स्रोतका अनुसार शनिबार प्रधानमन्त्रीको कार्यालयमा उनले राजीनामा फ्याक्स गरेर प्रधानमन्त्रीलाई फोनबाट जानकारी गराएका हुन् । बिदा भएकाले उनको फ्याक्स भने प्रधानमन्त्रीले साँझसम्म हेर्न नपाएको स्रोतले जनायो ।

प्रधानमन्त्रीका प्रमुख स्वकीय सचिव गंगानारायण श्रेष्ठका अनुसार बेलवासेले घूस मागेको सार्वजनिक भएपछि शनिबार बिहानै भट्टराईले फोन गरी राजीनामा दिन निर्देशन दिएका थिए । बेलवासे नेकपा मालेबाट मन्त्री भएका हुन् ।

म्यानपावर व्यवसायीको आवरणमा पुगेका 'भ्रष्टाचारविरुद्धको अभियान नेपाल' नामक सामाजिक संस्थाका पदाधिकारीसँग पार्टीका लागि भन्दै बेलवासेले रकम मागेका थिए । यसअघि भट्टराईले श्रम तथा रोजगारमन्त्री सरिता गिरीलाई समेत भ्रष्टाचारको अभियोगमा बर्खास्त गरेका थिए । बेलवासेले राजीनामा दिएपछि इतिहासमै सबभन्दा जम्बो ४९ सदस्यीय मन्त्रिपरिषद् गठन गरेर रेकर्ड राखेका भट्टराई सरकारमा जम्मा १६ मन्त्री बाँकी रहेका छन् । कांग्रेस, एमालेलगायतका दलले सत्ता छाडेपछि मन्त्रिपरिषद्को आकार सानो हुन पुगेको हो । भट्टराई सरकारमा बेलवासेबाहेक एमाओवादीका ६, मधेसी दलका ६ र माले समाजवादी, परिवार दल, नेपाः पार्टी र चुरे भावर पार्टीका एक/एक मन्त्री छन् ।
स्रोत :कांतिपुर