सडक दुर्घटनामा एकै परिवारका तीन जनाको मृत्यु
सिरहा, भाद्र १९ - सिरहा चोहर्बा सहायकमार्गको पदमपुरमा मंगलबार साँझ भएको सडक दुर्घटनामा एकै परिवारका तीन जनाको मृत्यु भएको छ ।
अयोध्यानगर १ कसहाका १७ वर्षीय निरञ्जन शर्मा, सोही ठाउँ बस्ने १८ वर्षीय रामकरण शर्मा र ४० वर्षीया विणा शर्माको मृत्यु भएको जिल्ला प्रहरी कार्यालय सिरहाले जनाएको छ । निरञ्जन र रामकरणको घटनास्थलमा नै मृत्यु भएको छ भने विणाको उपचारका क्रममा जिल्ला अस्पताल सिरहामा मृत्यु भएको प्रहरीले जनाएको हो । मृतक विणाका निरञ्जन र रामकरण छोरा र भतिज रहेको परिवारजनले बताए ।
चोहर्बाबाट सिरहा तर्फ आउँदै गरेको स१त ३००९ नम्बरको ट्याक्टरले विपरीत दिशाबाट आउँदै गरेको ज२प ४२४६ नम्बरको मोटरसाइकललाई ठक्कर दिँदा मोटरसाइकलमा सवार एकै परिवारका तीन जनाको मृत्यु भएको प्रहरी उपरीक्षक राजेशलाल कर्णले बताए । उक्त ट्याक्टरलाई प्रहरीले नियन्त्रणमा लिए पनि ट्याक्टर चालक फरार भएको प्रहरी उपरीक्षक कर्णले भने ।
मोटरसाइकल चालक निरञ्जनले साइकल यात्री राघोपुर ६ का ४६ वर्षीय लालबीर चौधरीलाई ओभरटेक गरे लगत्तै विपरीत दिशाबाट द्रुत गतिमा आएको उक्त ट्याक्टरले ठक्कर दिएको प्रत्यक्षदर्शी रामनरेश यादवले बताए । ट्याक्टरले मोटरसाइकललाई ठक्कर दिने क्रममा साइकल यात्री चौधरी पनि लडेर घाइते भएको र उनको सिरहा अस्पतालमा उपचार भइरहेको प्रहरी उपरीक्षक कर्णले बताए ।
समाचार कांतिपुर बाट
Posted by Butwalonline
on 6:33 PM. Filed under
