पतिलाई बचाउन खोज्दा घाइते भइन् लादेनपत्नी
बिन लादेनकी २७ वर्षीया कान्छी श्रीमती अमल अल सदाह श्रीमान्को रक्षा गर्न अमेरिकी सेनासँग जाइलागिन्
कसैले भने अमेरिकासँग जोरी खोज्ने ओसामा बिन लादेनले आफ्नै श्रीमतीलाई मानवढालका रुपमा प्रयोग गरे । कतिपयले भने लादेनले श्रीमतीको पछाडि लुकेर अमेरिकी सेनाविरुद्ध गोली प्रहार गरे । यसअघि अमेरिकी अधिकारीले समेत ओसामा बिन लादेनले आफ्नै श्रीमतीलाई मानवढालका रुपमा प्रयोग गरेको जानकारी दिएका थिए । ओसामा बिन लादेनले २७ वर्षीया श्रीमती अमल अल सदाहको पछाडि लुकेर मृत्युलाई छल्ने कोसिस गरेको सोमबार अमेरिकी प्रतिआतंकवाद प्रमुख जोन बि्रम्यानले आरोप लगाएका छन् ।
तर मंगलबार बिन लादेनकी श्रीमतीका बारेमा भनिएका सबै कुरा गलत निक्लेका छन् । अलकायदा प्रमुख ओसामा बिन लादेनविरुद्ध अमेरिकी सैन्य आक्रमण गर्दा बिन लादेनको ज्यान बचाउन उनकी कान्छी श्रीमती अमेरिकी सेनाको प्रतिकारमा उत्रिएकी थिइन् । ह्वाइटहाउसका प्रवक्ता जे कार्नीले ओसामाकी श्रीमतीको मृत्यु नभएको बताएका छन् । उनलाई केवल खुट्टामा गोली लागेको छ । बिन लादेनविरुद्ध अमेरिकी सेना आक्रमण गर्न आएपछि उनी प्रतिकारमा उत्रिएको तर उनलाई बिन लादेनले मानव ढालमा प्रयोग नगरेको पनि कार्नीले बताए । अमेरिकी सैन्य अभियानमा मारिएकी महिला बिन लादेनकी श्रीमती नभएर सहयोगीकी श्रीमती भएको पनि उनले बताए । लादेन पत्नी सादह त श्रीमान्लाई अमेरिकी सेनाको आक्रमणबाट बचाउन खोज्दा गोली लागेर ढलेकी थिइन् ।
यसरी अन्तिम अवस्थामा समेत विश्वले खोजिरहेका पतिलाई बचाउन खोज्ने अमल अल सदाह कैयौँ पत्नीमध्ये लादेनको सबैभन्दा प्यारी भएको बताइएको छ । यमनमा जन्मिएकी सदाहको बिन लादेनसँग १७ वर्षको उमेरमा करिब दस वर्षअघि बिहे भएको थियो । पश्चिमा राष्ट्रहरुले त्यसअघि देखि नै बिन लादेनलाई मस्ट वान्टेडको लिस्टमा राखिसकेका थिए । बिन लादेनसँग छोरीको बिहे गरिदिएकोमा सदाहका बाबु अत्यन्त खुसी भएका थिए रे । खाडी मुलुकसँग सम्बन्ध बलियो बनाउन बिन लादेन र सदाहको बिहे गरिदिएको बताइएको छ ।
श्रीमतीको सुरक्षाको चिन्ता गर्दै बिन लादेनले सदाहलाई यमन पठाएका थिए । तर उनी श्रीमान्लाई एक्लै छाडेर माइती बस्न रुचाइनन् । खुफिया एजेन्सीको आँखा छल्दै आइपुगिन् आफ्नै श्रीमान भेट्न । उनको उपचार अहिले रावलपिन्डी अस्पतालमा भइरहेको छ । लादेन पत्नी सदाह तथा अन्य सदस्यलाई पाकिस्तानमै राख्ने वा अन्य देशमा सुपुर्दगी गर्ने भन्ने विषयमा पाकिस्तान र अमेरिकी अधिकारीबीच विवाद भइरहेको बताइएको छ ।
Source:Naya Patrika
Posted by Butwalonline
on 9:26 AM. Filed under
