नेपालीको दोस्रो ठूलो चाड तिहार आजबाट सुरु

काठमाडौं, कार्तिक २६ । नेपालीको दोस्रो ठूलो चाड तिहार अर्थात् यमपञ्चक आजबाट सुरु भएको छ । कात्तिक कृष्ण त्रयोदशीदेखि कात्तिक शुक्ल द्वितियासम्म मनाइने तिहारको पहिलो दिन आज साँझ दैलोमा यमराजलाई स्मरण गरी दीपदान गरिन्छ । भोलि घरघरमा कागको पूजा गरी काग तिहार मनाइन्छ । पर्सी २८ गते नरक चतुर्दशी र कुकुर तिहार मनाइन्छ । त्यसै दिन औशी पनि परेकाले धनकी देवी लक्ष्मीको पूजा आराधना तथा दीपावली गर्नु उत्तम हुने पञ्चांग निर्णयक समितिले जनाएको छ । यस रात्रिलाई सुखरात्रिका नामले पनि चिनिन्छ । लक्ष्मीपूजा र गोवद्र्धन पूजाका दिन केटाकेटी तथा युवायुवती घरघरमा गई देउसी, भैलो खेल्ने गर्दछन् ।


कात्तिक २९ गते बुधबार कात्तिक शुक्ल प्रतिपदाका दिन बिहान गोवर्धन पूजा, गाई–गोरु पूजा तथा साँझ नेवार समुदायमा म्हः पूजा अर्थात् आत्मपूजा गरिन्छ । र अन्तिम दिन कात्तिक ३० गते भाइटीका लगाइन्छ ।


कात्तिक ३० गते मध्याह्न ११ बजेर २३ मिनेटमा भाइटीकाको उत्तम साइत रहेको पञ्चांग निर्णायक समितिले जनाएको छ । यसदिन दाजुभाई, दिदीबहिनीले आपसी स्नेह, सत्कार तथा पूजा गरी भाइटीका मनाउँदा दाजुभाईको यश तथा आयु बढ्ने र उनीहरु सुखी तथा सम्पन्न हुने विश्वास गरिन्छ । वैदिक कालमा बलि राजाले आफ्नो राज्यभर झकिझकाउका साथ दीपावली गरेर विष्णुलाई खुसी तुल्याएकाले यमपञ्चकभर तीनै लोकको राज्यभोग गर्न पाउने बरदान पाएको तथा यस अवधिमा धनकी देवी महालक्ष्मीले सबैको घरमा बास गरी धनधान्यले पूर्ण पारिदिएको कथा पनि यो पर्वसँग जोडिएको छ ।
इमेज च्यानल