एसिसी एलिटकप प्रतियोगितामा नेपालद्वारा सिंगापुर १०१ रनले पराजित

क्वालालम्पुर, वैशाख २९ - मलेसियामा जारी एसिसी एलिटकप क्रिकेट प्रतियोगिताको शुक्रबार भएको खेलमा टस् जितेर पहिलो ब्याटिङ रोजेको नेपालले बलियो प्रतिद्वन्दी मानिएको सिंगापुरलाई पराजित गरेको छ । योसँगै नेपालको यो पाँचौं अपराजित यात्रा हो । नेपालले ४० ओभरको खेलमा ९ विकेट गुमाउँदै २ सय ४० रन जोडेको थियो । प्रतिद्वन्द्वी सिंगापुर भने ३६ विकेट ५ बलमा अल-आउट हुँदै १ सय ३९ रनमा सीमित भयो । नेपालले १ सय १ रनले सिंगापुरलाई पराजित गरेको हो ।

सन् २०१० को पहिलो संस्करणको फाइनलमा सिंगापुर र नेपाल भिडेका थिए । त्यतिबेला काठमाडौंमा भएको फाइनलमा सिंगापुरले नेपाललाई ६८ रनले हराएको थियो । यसपटक भने सिंगापुर समूह ए को उपविजेतामै सीमित भएको थियो । तापनि बलियो दाबेदारको रुपमा लिइएको सिंगापुरलाई नेपालले दुई वर्षअघिको हारको बद्ला यसपालि लिएको छ । शुक्रबारको खेलमा जगदीश चन्द म्यान अफ् दि म्याच घोषित भएका छन् । उनले ५३ रन जोडेका थिए ।

यसअघिका खेलमा नेपालले समूहचरणमा इरानमाथि १ सय ६७ रनको जित निकालेको थियो । घरेलु टिम मलेसियामाथि भएको बुधबारको खेलमा नेपालले १ विकेटले जितेको थियो । त्यसैले पनि नेपाली टिममा आत्माविश्वास बढेको थियो । नेपाल समूह चरणमा कुवेतलाई ७१ रन, बहराइनलाई आठ विकेट, इरानलाई १ सय ६७ रन र मलेसियालाई एक विकेटले हराएको थियो । सिंगापुरले पहिलो खेलमा हङकङलाई सात रन र ओमानलाई १२ रनले हराएको थियो । समूहको अन्तिम खेलमा सिंगापुर थाइल्याण्डबाट नै रनले पराजित भएको थियो ।

नेपालका आकाश विष्टको उत्कृष्ट ब्याटिङले बुधबार नेपालले मलेसियालाई १ विकेटको चामत्कारिक जित निकालेको थियो र चारै खेलमा जित निकाल्दै समूह वि को बिजेता बन्न सफल भएको थियो ।

समाचार कांतिपुर बाट