शिक्षकले नै छात्रालाई लभ लेटर दिएपछि हंगामा

काभ्रे पुस १ - विद्यालय घर पछिको सुरक्षित स्थान मानिन्छ भने शिक्षक/शिक्षिकालाई दोस्रो अभिभावक । तर, शिक्षकले नै कलिला छात्रामाथि आँखा गाडेर ‘लभ लेटर’(प्रेमपत्र) पठाएपछि शिक्षालय कस्तो बन्ला ? धेरैलाई आश्चर्यमा पार्ने दृश्य काभ्रेको देवभूमि बालुवामा देखिएको छ ।

पाँचखाल क्षेत्रको देवभूमि बालुवामा अवस्थित ब्राइट फ्युचर स्कुलमा पढाउने दुई शिक्षकले कक्षा ६ र ८ मा पढ्ने छात्रालाई लभ लेटर दिएर शिक्षक पेसाकै मर्यादा घटाएका छन् । झापा स्थायी घर भएका भरत कँडेल र शिवप्रसाद उप्रेतीले १२ र १४ वर्षका छात्रालाई लभ लेटर दिने गरेको रहस्य उनीहरुका अभिभावकले सार्वजनिक गरेपछि यसले ठूलै हंगामा मंच्चिएको छ ।

शिक्षकद्वय कँडेल र उप्रेतीले पठाउने गरेको प्रेमपत्रमा अश्लील शव्दको समेत उल्लेख गरेको भेटेपछि छात्राका अभिभावकहरु आक्रोशित बनेको रामचन्द्र श्रेष्ठले जानकारी दिएको खबर राजधानी दैनिकले छापेको छ । आक्रोशित अभिभावकले उनीहरुलाई कडा कारबाही गर्न माग समेत गरेका छन् । शिक्षक द्वयले पहिले पनि अन्य छात्राहरुलाई लभ लेटर पठाउने गरेको तथ्य पछिल्लो घटना सार्वजनिक भएपछि उजागर भएको हो ।

अभिभावकको उजुरी पछि विद्यालयका प्रिन्सिपल पर्शुराम कँडेलले आरोपित शिक्षकद्वयलाई प्रहरीको जिम्मा लगाएका छन् ।
स्रोत :ऑनलाइन खबर