कतार नेपाली श्रमिकहरुको प्रमुख गन्तव्य मुलुकहरुमध्ये अग्रस्थानमा
काठमाडौँ, भदौ १४ - श्रम स्वीकृति लिएर रोजगारका लागि विदेशमा जानेहरुको संख्या अघिल्लो वर्षको तुलनामा आर्थिक वर्ष २०६८/६९ मा बढेको छ। देशको वर्तमान आर्थिक स्थितिबारे जारी गरेको तथ्याङ्क अनुसार संख्या ८.४ प्रतिशतले बढेको हो|
नेपाल सरकार, वैदेशिक रोजगार विभागले आर्थिक वर्ष २०६८/६९ मा कूल ३ लाख ८४ हजार ६६५ जनालाई वैदेशिक रोजगारीको लागि अन्तिम स्वीकृति प्रदान गरेको हो।
विगतमा जस्तै आर्थिक वर्ष २०६८/६९ मा पनि नेपाली श्रमिकहरुका प्रमुख गन्तव्य मुलुकहरुमा मलेशिया र खाडी मुलुकहरु नै रहेका छन्।
समीक्षा वर्षमा कूल श्रमिकहरुमध्ये २७.५ प्रतिशतले कतार, २५.६ प्रतिशतले मलेशिया, २०.९ प्रतिशतले साउदी अरब, १४.२ प्रतिशतले यू.ए.ई. तथा ६.४ प्रतिशतले कुवेत र बाँकी ५.५ प्रतिशतले अन्य मुलुकका लागि विभागबाट अन्तिम श्रम स्वीकृति लिएका छन्।
समीक्षा वर्षमा मलेशियाको लागि अन्तिम श्रम स्वीकृति लिने नेपाली श्रमिकहरुको संख्या अघिल्लो वर्षको तुलनामा ७.१ प्रतिशतले कमी आएको छ भने कतारको लागि श्रम स्वीकृति लिनेको संख्या २.६ प्रतिशतले वृद्धि भई नेपाली श्रमिकहरुको प्रमुख गन्तव्य मुलुकहरुमध्ये कतार अग्रस्थानमा रहन पुगेको तथ्याङ्कले देखाएको छ।
समाचार नागरिक न्यूज बाट
Posted by Butwalonline
on 4:45 PM. Filed under
